Os grupos parlamentarios da oposición no Parlamento galego fan público un comunicado conxunto en protesta pola decisión da dirección da Corporación da Radio e Televisión de Galicia de non retransmitir en directo a sesión da Deputación Permanente celebrada no Parlamento o venres 3 de abril, na que se debatiu a problemática xerada pola crise do COVID-19.

No seu escrito, o PSdeG-PSOE, o Grupo Común da Esquerda, o Bloque Nacionalista Galego (BNG) e o Grupo Mixto recordan que os medios públicos teñen a responsabilidade, tanto «profesional» como «legal» de achegar á cidadanía unha información «plural», «obxectiva» e «sempre guiada por criterios de imparcialidade, neutralidade e veracidade» e que se debe prestar «especial atención» a todos aqueles debates que se realicen na Cámara galega, tal e como se recolle na Lei de creación da CRTVG, a Lei de medios públicos audiovisuais de Galicia e no Mandato Marco da CRTVG.

ESTASE A FURTAR INFORMACIÓN Á CIDADANÍA

Para os grupos parlamentarios «resulta incomprensible que ante unha crise sanitaria sen precedentes que se ten cobrado a vida de máis de 10.000 persoas, a televisión pública que os galegos e as galegas sufragan con 100 millóns de euros cada ano furte información sobre as propostas das formacións políticas para combater a pandemia, tanto no aspecto sanitario como económico».

Segundo denuncian, mentres este venres se estaban a debatir no parlamento medidas para afrontar a crise, «a TVG emitía un programa de cociña explicando a alaboración dunha receta culinaria, anuncios da teletenda e o resto da programación ordinaria» por decisión da dirección do ente público, «con Alfonso Sánchez Izquierdo como principal responsable».

Para os formacións políticas «é intolerable que, mesmo no medio dunha pandemia, o PP siga facendo unha utilización partidista dos medios públicos e utilizando a televisión pública como canle de publicidade e propaganda ao servizo do Executivo de Feijóo e do Partido Popular».

Para ás forzas, «o dereito á información é un dereito fundamental que debe ser garantido en calquera situación e contexto, pero aínda máis en momentos de excepcionalidade». Por iso «a decisión de censurar o debate parlamentario supón de facto unha vulneración dese dereito, porque impide o dereito das galegas e galegos a coñecer, contrastar e reflexionar sobre a acción política do Goberno da Xunta en relación á crise polo COVID-19 e, tamén, negar o acceso ás opinións, posicións e propostas dos distintos grupos parlamentarios».

RESPONSABILIDADE

Por iso, os grupos parlamentarios solicitan á dirección da CRTVG «que actúe con responsabilidade de país, tendo en conta que se debe ao pobo galego e non aos intereses partidistas do PP» e esixen que facilite que os medios públicos galegos cumbran coa súa misión de servizo público «garantindo unha información de proximidade que respecte os principios de pluralidade, imparcialidade, neutralidade e veracidade informativa».

SOLIDARIEDADE CO PERSOAL DA CORPORACIÓN

O persoal dos medios públicos galegos celebrou xa 98 «venres negros» / Defende a Galega

Para finalizar, as forzas políticas desexan trasladar a súa «solidariedade e apoio» aos traballadores e traballadoras da CRTVG «que tentan facer o seu labor con profesionalidade e rigor», que que xa levan «98 venres negros» para denunciar a manipulación informativa «e en defensa dunha RTVG ao servizo da sociedade galega».