O BNG amosa o seu apoio a manifestación convocada baixo o lema Por un plano forestal para un medio rural vivo convocada polas diferentes organizacións sindicais agrarias e a Organización galega de comunidades de montes contra a privatización do monte en man común, que terá lugar o vindeiro domingo 22 de abril, en Santiago de Compostela.
O BNG fai un chamamento a participar na manifestación, que partirá da Estación de Tren de Santiago de Compostela, ás 12 horas pola defensa dunha política do monte que aposte por un monte limpo, vivo e multifuncional, e cun aproveitamento integral porque o monte é algo máis que madeira, xera riqueza, emprego e revitaliza o medio rural.
Entre as medias para unha nova política do monte, o BNG propón frear a expansión do eucalipto recuperando as 35.000 hectáreas ilegais desta especie plantadas en terras agrarias, dotación orzamentaria para, en colaboración cos concellos, garantir o cumprimento das franxas de seguridade con infraestruturas e vivendas para preservar a seguridade das persoas, sobre todo naquelas zonas de alto risco de incendios.
Ademais, o BNG reclama aprobar o PLADIGA no primeiro trimestre do ano, mudar o dispositivo de loita contra os lumes apostando pola profesionalización e un mando único así como dotar aos concellos dun teléfono exclusivo no que alcaldes e alcaldesas reciban atención inmediata ante unha emerxencia.
