O BNG Insta á sociedade a expresar masivamente na rúa a súa repulsa contra o terrorismo machista Ana Pontón: “O feminicidio de Valga, constata a falta de recursos e medios para loitar contra a violencia machista”

O BNG insta á sociedade galega a saír á rúa para manifestar a súa repulsa ao triplo asasinato machista de Valga secundando as mobilizacións que o movemento feminista galego ten convocadas en todo o país para este mércores.

Na comparecencia posterior á Xunta de Portavoces, a viceportavoz parlamentaria, Olalla Rodil, lanzou un chamamento “a favor dunha mobilización masiva para manifestar de xeito colectivo e como sociedade a repulsa e o rexeitamento a todas as formas de violencias machistas, sexan dentro do ámbito da parella ou fora del”.

Igualmente, o Bloque volveu facer fincapé na necesidade de rexeitar ás forzas políticas que cuestionan a existencia da violencia de xénero coa pretensión de diluíla noutro tipo de violencias.

“Urxe amosar o noso rexeitamento ás forzas políticas que practican ese discurso, -en referencia a ultra dereita de VOX-, pero tamén á aquelas outras forzas que lles abren as portas das institucións a través de pactos de goberno, como é o caso de Andalucía ou de Madrid, a quen nega que ás mulleres se nos asasina constantemente, día a día, como traxicamente volvemos constatar onte en Valga ”, denunciou a viceportavoz. “

O BNG denuncia tamén o disparate de que haxa circunstancias nas que a vítima non sexa considerada un caso de terrorismo machista, – como por exemplo no crime rexistrado en Valga-, e salienta que a Lei Galega contra a violencia de xénero de 2007, impulsada polo Bloque desde o Goberno da Xunta, vai máis aló da normativa estatal e establece que as vítimas deste triplo asasinato son todas atribuíbles á violencia de xénero.