O Comité Intercentros da CRTVG denuncia a instrumentalización da cadea pública a prol da mina de Touro e esixe o cese de Alfonso Sánchez Izquierdo por permitir outro “inaceptable episodio de manipulación informativa”

O colectivo secunda a denuncia da veciñanza de Touro e O Pino sobre a utilización da Televisión de Galicia a favor dos intereses de Cobre San Rafael -filial de Atalaya Mining e Explotaciones Gallegas-, unha tríada que dende hai anos pretende reabrir o proxecto da mina de Touro, un proxecto que consideran “pode ter consecuencias imprevisibles para as comarcas de Arzúa e Santiago e a ría de Arousa”.

Por este motivo, a representación unitaria do persoal da Corporación de Radio Televisión de Galicia (CRTVG) apoia a reclamación de dimisión do Director Xeral, Alfonso Sánchez Izquierdo “por este novo e inaceptable episodio de manipulación informativa, contrario aos principios de obxectividade, imparcialidade, veracidade, e  neutralidade informativa nos que  se debe  inspirar a actividade de comunicación audiovisual da Corporación”.

O Comité Intercentros denuncia que tal como fixo constar a Plataforma veciñal Cornado Mina Non na reclamación presentada ante o organismo, o pasado 10 de marzo tivo lugar unha “utilización descarada dos medios públicos” na que a TVG presenta como un “proxecto sostible” o anuncio da empresa Cobre San Rafael dun investimento en restauración de augas, cando en realidade esta actuación parte da obriga que a Dirección Xeral de Enerxía e Minas impuxo a Explotaciones Gallegas como propietaria dos terreos da mina de Touro en 2018, logo de máis de 30 anos de abandono das súas obrigas legais.

“Ao mesmo tempo, a TVG silencia as voces autorizadas de organizacións como ADEGA ou a Sociedade Galega de Historia Natural e as fundamentadas queixas da veciñanza, na denuncia dun proxecto que xa foi maioritariamente rexeitado tanto pola cidadanía como pola Administración pola súa inviabilidade técnica e ambiental” -recordan dende a organización-.

Para rematar, o Comité Intercentros fai un chamamento aos poderes públicos “a ter a determinación necesaria para poñer fin, dunha vez por todas, á noxenta manipulación informativa na CRTVG”, polo que claman polo “inmediato cesamento” de Alfonso Sánchez Inquierdo e a designación por unha maioría cualificada do Parlamento galego dunha nova Direccion Xeral “que garanta os valores do pluralismo, a veracidade e o acceso a fin de contribuír á formación dunha opinión pública informada, como alicerce dunha sociedade verdadeiramente democrática”.