O grupo de goberno rexeitou unha Proposición non de Lei presentada dende o Grupo Común da Esquerda ante a ameaza que este tipo de negocios supoñen para a sociedade.

Carmen Santos expresou esta mañá na Comisión 1ª, de Institucional, Administración Xeral, Xustiza e Interior, a súa preocupación pola crecente proliferación de locais de casas de apostas en Galicia. «Tiñamos 136 casas de apostas en Galicia en xaneiro, e agora mesmo estamos xa nas 159. A isto hai que sumar as 3171 máquinas situadas en locais de hostelería. O regulamento do ano 2012 da Xunta fixaba o máximo en 2000 máquinas nos locais; en 2017 aumentouno a 3600 máquinas, cifra que xa estamos a piques de acadar», denunciou a deputada do Grupo Común da Esquerda.

Na súa intervención, Santos abordou a problemática da ludopatía en Galicia, «especialmente entre a mocidade», e lembrou que é responsabilidade das administracións tomar medidas como «regular o acceso aos establecementos e o uso das máquinas» e investir en «prevención» e en «abordar o problema do xogo no sistema educativo».

Santos referiuse tamén á iniciativa presentada en 2018 polo Partido Popular de creación dunha nova Lei do Xogo, e lembrou que expertos coma o profesor Antonio Rial Boubeta (Psicoloxía USC) teñen apuntado a que esta lei chegaba moi tarde, cando xa se estaban a «recoller cadáveres polas cunetas». Referiuse tamén a declaracións do profesor nos medios de comunicación nas que cualificaba as apostas como un «negocio voraz» que xa representaba «o 2% do PIB español».

A deputada lembrou que as casas de apostas e o xogo ‘online’ están a «causar un gran dano, especialmente entre a mocidade e as persoas que se viron máis afectadas pola crise económica». No respectivo á adicción ao xogo entre a xuventude, demandou á Xunta que non permita «a apertura deste tipo de locais preto de espazos infantís e xuvenís, coma colexios e institutos ou mesmo parques infantís, como ocorreu en Vigo, en Navia, causando as protestas das asociacións veciñais do barrio».

Finalmente, Carmen Santos criticou que a Lei de Xogo de Galicia confíe en que as propias empresas do xogo exerzan un «autocontrol» sobre a súa actividade e contribúan á prevención contra a ludopatía. «Cando hai tanto capital investido e posibilidade de gañar tantos cartos, é unha utopía pensar que as empresas se poden autorregular», sentenciou.

Vídeo Recomendado:

Deja un comentario