A portavoz de Vivenda do Grupo Socialista, María Pierres, acusou ao PP de ser “cómplice dunha farsa” coas axudas públicas ao aluguer de vivenda e xustificar así a “cara de cemento” demostrada por Feijóo ao falsear os datos no Pleno do Parlamento. Pïerres presentou unha proposición non de Lei en Comisión parlamentaria para reclamar o pago das axudas galegas ao Plan Estatal, que acumulan un ano de retraso, e que foi vetada polo PP.
A responsable socialista denunciou a “irresponsabilidade máxima” do goberno galego ao “xogar coas expectativas e as necesidades da cidadanía galega”, en concreto coas 12.000 persoas que solicitaron estas axudas que necesitan para chegar a fin de mes, e acusou ao PP de “encubrir a incapacidade e inoperancia” do Executivo. Lamentou a “falla de implicación da Xunta” con estas axudas, que dividen nunha liña xeral para familias e outra específica para menores de 35 anos.
Pierres denunciou que o presidente da Xunta “mentiu en sede parlamentaria” ao sinalar que os mozos e mozas dedican o 31 por cento dos seus ingresos para acceder a unha vivenda, cando a realidade é que ese esforzo é de “fogares xóvenes”, pero a realidade é que os mozos e mozas teñen que dedicar o 56,5 por cento do seu salario á vivenda.
A liña de axudas para menores de 35 anos é polo momento a única resolta, se ben 12 meses despois de presentar as solicitudes, e a Xunta só concedeu 330 axudas, o 8,25 por cento de todas as que foron presentadas. Pierres explica que este resultado era esperado por canto o goberno galego non puxo un euro de cartos propios do seu orzamento, como si fixeron outras comunidades autónomas, e as axudas limitáronse aos 800.000 euros aportados polo Estado.
A liña de axudas ao aluguer para familias con dificultades, por outra parte, que ascenden aos 3 millóns de euros, nin sequera foron resoltas a día de hoxe, despois de publicar as axudas para o próximo ano. Alertou de que “as partidas habilitadas só chegarán, no mellor dos casos, a un máximo do 20 por cento dos solicitantes”, o que atendería a 1.600 persoas dun total de 8.000.
María Pierres contrastou o desleixo e “falla de humildade” demostrados polo goberno galego coa actuación de outras comunidades autónomas, como é o caso de Castela A Mancha ou Aragón, que dedican 11,45 e 8,9 millóns, respectivamente, fronte aos 3,7 de Galicia. Advertiu de que Galicia dedica moito menos orzamento cando ten unha cuarta parte de poboación máis que Castela A Mancha e o dobre que Aragón.
Ademais, as resolucións en Castela A Mancha foron resoltas xa en abril, concedendo a totalidade das que cumprían as condicións, o 70 por cento das axudas para familias en dificultades, chegando a máis de 5.000, número semellante ao de Aragón, onde foron admitidas a metade delas. As dúas autonomías admitiron ademais o 59 por cento das axudas solicitadas para o alugueiro de mozos e mozas, fronte ao 8,25 por cento de Galicia.
